Mertxe Arano

 

EKARRIZKETA: 2022KO OTSAIAREN  4AN

 

Mertxe Arano

Duela 14, 15 urte Orereta ikastolako gurasoa naiz. Alaba dagoeneko Ikastolatik atera da eta semea DBH2an dago.

Duela 11 bat urte hasi nintzen guraso bezala ikastolaren dinamikan inplikatzen eta gaur egun arte, beste arduretan ibili ondoren, gurasoen batzordean egoteaz gain azken 3 urteetan artezkaritzan ere banago.

NOLA DEFINITUKO ZENUKE ORERETA IKASTOLAREN KOMUNITATEA?

Orereta ikastolako komunitatea oso handia da. 1400 ikasle inguru daude horrek suposatzen duen guztiarekin, irakasleak, langileak, … Hori guztia ondo funtzionatzeko engranaje on bat behar da, eta hori gu gara, ikastolako komunitatea. Komunitateko hiru estamentuak bat egiten dugu: ikasleak, gurasoak eta langileak. Horren bitartez behar den guztia aurrera eramaten saiatzen gara; bai hezkuntza proiektua baita antolatzen diren gainontzeko ekitaldi eta ekimenak ere.

Engranaje horretan gurasoen papera ezinbestekoa dela iruditzen zait. Gure laguntzarekin, iradokizunekin, baita kexekin ere, ikastola den proiektuari bultzada ematen zaiola pentsatzen dut nik.

Ondo barneratuta daukagu ikastolaren proiektuaren baitan gurasoak pertsonak inplikatuta izan behar garela, gurasoak pro-aktiboak nolabait esatearren.

Nahiz eta aitortu batzuetan gurasoak dinamika honetan inplikatzea zaila dela, orokorrean, bai gurasoen batzorde guztietan, bai antolatzen diren ekimen guztietan ere, gurasoak inplikatu egiten dira.

Gurea kooperatiba bat da, gurasook osatzen dugun kooperatiba eta bere organo gorena artezkaritza da, hau da, gurasoen, zuzendaritzaren, irakasle batzuen eta zerbitzutako langileen artean osatutako taldea da.

GURASOEN IKUSPUNTUTIK ZERGATIK ETA ZERTARAKO ANTOLATU NAHI DA KILOMETROAK JAIA?

Hiru xede nagusi hauek ikusten ditut:

Batetik, Kilometroak orokorki eta gure herrian bereziki, euskaltzale guztion topagunea izan beharko litzateke.

Bigarrenik, Ikastola den hezkuntza proiektua herrian ezagutarazteko oso aukera ona da baita ere.

Eta hirugarrenik, muga beste aldean zailtasun handiz lan egiten duten ikastolentzako ere diru iturri garrantzitsua izan daiteke, gure elkartasuna adieraztea

Hiru xede hauek gainera jai giro batez lantzen eta lortzen baditugu oso Kilometroak ederra eta erakargarria izango da Kilometroak 23.

Beraz, Oreretan antolatzera goazen Kilometroak jaiaren bitartez euskaltzaleen harremana indartu eta sendotu beharko genuke.

Kilometroak ez dadila parrandarekin parekatzen den jai bat; adin eta pertsona ezberdinen arteko harremanak zein bizipenak modu kualitatiboan landuko den giro ludikoa baizik.

Jai honetan euskara indartu behar da. Gero eta gehiago ikusten ari gara gazteek (eta ez hain gazteek) egunerotasunean erdera gero eta gehiago erabiltzen dutela eta Kilometroak euskaltzaleentzako jai bat izateak, euskarari protagonismoa ematea suposatzen du.

ORERETAN IKASTETXE BAT BAINO GEHIAGO DAUDE. INDAR METAKETA HORRETAN KILOMETROAK NOLA TXERTATZEN DA ORERETA HERRIAN?

Kilometroak besteen artean beste jai bat izango da. Gogoan dut duela bizpahiru urte Eskola publikoaren aldeko jaia Oreretan antolatu zela eta Ikastola jai horretan egon ginen, bai hasierako dinamikan, baita iraunkorki partehartzen ere. Gure jarrera irekia eta partehartzailea izan zen. Gainera ikastolaren eguna egun berean ospatzen zelako, Eskola publikoaren jaia ez oztopatzeko gurea aldatu egin genuen. Oraingoan berdina izango dela pentsatzen dut. Ez dakit beste ikastetxeetatik laguntza jasoko dugun, baina ziur nago ez dugula oztoporik izango. Egunerotasunean gure arteko harremana ona da eta horri eutsiz aurrera jarraitu behar dugu.

Aldi berean, esan beharra dago hemendik oso gertu Haurtzaro eta Pasaia Lezo lizeoa dauzkagula eta beraiekin gauzak egiteko ere kontatzen dugula.

Zubiak eraikiz ekimenaren ondorioz, Berako Labeaga ikastolarekin harreman sendotu dugu eta harreman hori jaiaren erdigunean jartzea ere espero dugu. Ahaztu gabe Lapurdiko ikastolekin ere dugun harremana eta iraganean elkarrekin egin izan ditugun ekimen bateratuak.

Ikusten duzun bezala, ikastola eta ikastetxe asko parte hartzeko jaia izan daiteke gure Kilometroak. Asmatu behar duguna da elkarrekin aritzeko dinamika pizten.

NOLA IKUSTEN DUZU KILOMETROAKEN ANTOLAKETAN GURASOEN INPLIKAZIOA?

Kilometroak antolatzeko seguru nago jende asko beharko dela. Kilometroak antolatzeko hautagaia izatearen erabakia ez zen artezkaritzan hartu. Hala eta guztiz ere, gu geletara joan ginen eta zuzen-zuzenean gurasoei ea Kilometroak antolatzeko prest ote ziren galdetu genien eta orokorrean erantzuna positiboa izan zen. Erabakia, normala den bezala tentuz eta errespetuz hartu zen (oso jai handia delako), baina jaso genuen erantzuna aurrera egiteko modukoa izan zen.

Horregatik uste dugu Kilometroak antolatzeko erantzuna polita izango dela eta partehartzea, bai bileretan, batzordeetan eta ekimenetan ere ona izango dela.

LEHEN IKASTOLAKO HIRU ESTAMENDUAK AIPATU DITUZU. IKASLEEN INPLIKAZIOA NOLA LORTU DAITEKE?

Ezinbestean haurrentzako behar diren animazioak antolatu behar dira.

Gazteentzako Erronka ekimena oso polita dela iruditzen zait. Agian ekimen honek dituen muga batzuk (parte hartzen duten gazteak gutxi batzuk dira) gainditu behar dira, baina orokorrean eredu ona dela pentsatzen dut.

Kontzertuak eta horrelako ikuskizunak ere garrantzitsuak dira.

Hala eta guztiz ere, antolatzen diren ekimenetan partehartzeaz gain, nik bai pentsatzen dut antolaketan ere parte hartuko dutela.

Dagoeneko ikasle ohiak galdezka daude ea noiz hasiko da Kilometroak antolatzen.

ZER EZAUGARRI IKUSI ETA ZER BAZTERTU NAHIKO ZENITUZKE 23. URTEAN ORERETAN ANTOLATUKO DUGUN KILOMETROAK JAIAN?

Argi dagoena da desfaseak baztertu behar dira. Kilometroak jaia ez da horretarako edo ez litzateke horretarako izan behar. Kilometroak harremanetarako, elkar ezagutzarako antolatu behar da.

Nik adin guztietako jendea nahastuta, gune batean edota bazkari baten inguruan, jaten, abesten edota dantzatzen, giro hori sortuko duen ekimen baten alde egingo nuke.